政壇：搞搞政：元旦遊行後集會民陣佔中唔一齊
政改諮詢將於下月展開，一如往年，民間人權陣線將會喺元旦日舉辦遊行，其他政黨團體亦會一齊響應，呼籲市民行上街頭爭取普選。勢估唔到嘅係，嚟緊嘅元旦，佔領中環嘅發起人唔會同民陣同路。乜佢哋唔係都爭取緊同一班市民嘅支持咩？
設計圖片及對白
今年七一遊行，民陣以「佔領中環，蓄勢待發」作為遊行主題，主辦單位聲稱有四十三萬人參與，警方就話有六萬六千人，唔少市民更喺遊行結束後自發留喺中環遮打道行人專用區，參加由佔中發起嘅佔中集會。不過來年大家唔會再見到「民陣＋佔中」呢個組合，原因就係因為佔中秘書處表明，今次唔會夥拍民陣舉行晚間集會。
評估當日情緒高漲
據聞，佔中初時認為應該趁住元旦遊行氣勢，搞大型活動宣傳佔中訊息，但發起人之一嘅陳健民近日改口話佔中當日唔會舉辦任何活動，因為佢哋經過一連串評估後，相信當日遊行人士情緒高漲，同主打「愛與和平」嘅音樂會可謂南轅北轍。陳健民又話依家仲有唔少團體未完成第二階段商討日，認為個別團體未必趕得切喺元旦當日上台分享經驗，所以決定最遲一月初再另搞音樂會。
民陣原定都係諗住同佔中秘書處一齊喺遊行後搞集會，但既然依家秘書處唔一齊搞，佢哋亦唔會強人所難，遊行後亦會照搞集會邀請社會人士上台發言。泛民中人組合多，令人眼花繚亂，早前傳出「公民提名」四個字係不同團體參加遊行嘅關卡，喺呢個前提下，連真普聯都可能唔參加。民陣副召集人王浩賢否認此事，話既然大家都係泛民中人，一定會以公民提名作為終極爭取目標，相信真普聯咁多個團體會同意佢嘅講法喎！
