政壇：黃之鋒歪理佔中利經濟
話說特首梁振英尋日落區出席諮詢會，學民思潮等團體當然把握機會示威，但係望極都唔多覺召集人黃之鋒喺現場，唔通佢都慳番啖氣唔抗議？原來佢應承咗中學生聯合委員會出席講政改嘅研討會，議題當然唔少得佔領中環，佢反駁佔中癱瘓香港經濟嘅講法，仲掉番轉話會刺激經濟喎！
黃之鋒
黃之鋒反駁話，依家好多金融交易已經喺網上做，癱瘓中環影響未必太大，又話原來上年反國教科集會，金鐘海富中心快餐店坐爆晒人，嗰幾日去麥記連豬柳蛋漢堡都賣清光，所以話佔中隨時會刺激中環嘅飲食業。如果佢嘅歪理成立，快餐店應該快快去撐佔中，同埋最好喺中環開多啲分店喇！
佢又話《基本法》起草嗰時無諮詢，冇獲得港人認受，但係其實八十年代成立咗基本法諮詢委員會徵求港人意見，佔中發起人戴耀廷仲係學界代表之一。難怪早前有人叫黃之鋒去讀多啲歷史啦。
