政壇：鍾普洋退休享受打書釘
唔少事業有成嘅商人，前半生為事業奮力打拚，終身都「退而不休」，少有全情投入咁享受退休生活。不過，年屆七十歲嘅DHL亞太區創辦人Po鍾普洋，就似乎好享受悠閒嘅生活節奏。月前遇到佢喺中環同一名年輕女士企喺商場內閒聊，早幾日又見佢一支公現身置地廣場，先去一間書店打書釘，轉個頭就見佢坐喺一間精品店內與店員傾偈，似乎樂得清閒咁噃。
鍾普洋一心二用，戴住耳筒打書釘。
當日下午約三點鐘，身穿白色西裝褸配格仔恤衫嘅Po，一個人喺置地廣場內逛街，心口仲插住條袋巾，成個英式紳士咁款。佢戴住對免提耳筒聽音樂，期間走進一間英文書店，隨手揀咗本英文書翻閱，然後開始入晒神咁打書釘，睇睇吓仲拎埋副老花眼鏡出嚟睇真啲添。見佢睇得咁投入，記者都唔好意思打擾佢，於是離開書店。點知三分鐘後，行經附近嘅一間特色精品店，竟然見到Po已經坐咗喺入面，唔通佢識得瞬間轉移？
