政壇：蕭楚基食腦抗貴租
二○一三年眨眼又近尾聲，生意人齊齊部署明年大計。全港擁有二十間粥麵店嘅海皇粥店執行董事蕭楚基就話，仍睇好個人遊繼續暢旺，雖然商舖瘋狂加租，但佢無意收縮分店數目，寧願靈活走位，由一線區搬去二線區，再砌過。
蕭楚基睇好明年個人遊市道仍然大旺。
樓市靜到幾乎零成交，但商戶加租就未停過。蕭老闆話，早前佢位於元朗教育路一個三千呎舖位租約期滿，業主由月租二十九萬元加至五十萬元，佢計過數，無得玩，唔再續租，寧願轉攻另一條街一個千五呎舖位，月租同樣係二十多萬元。
但該月租五十萬元嘅舖位，轉頭就畀莎莎國際主席郭少明租咗嘞！
香港開舖要捱貴租，蕭老闆近年轉戰內地開茶餐廳，早前已喺東莞連開三間，佢笑言五千呎舖位月租才五萬人民幣，抵過香港好多，但食物收費卻同香港睇齊，事關東莞人消費力強勁，平均每戶人擁有三、四架車，使錢好豪爽。
咁好搵，一於明年喺東莞開多五間喎。
