政壇：張建宗緬懷青葱歲月
唔少男士都深受脫髮困擾，就連勞工及福利局局長張建宗都唔例外，佢上周日出席循道愛華村服務中心成立五十周年慶典，大爆自己三十年前曾以東區民政主任身份，出席該中心二十周年紀念儀式，仲喺網誌附上珍貴陳年照片，時光倒流三十年，等大家重溫佢昔日滿頭黑髮、英俊瀟灑嘅後生Look。張建宗早年只係負責區內事務，但如今貴為勞福局局長，自不然多咗唔少公務，再加上輸入外勞同實施標準工時等棘手問題接踵而來，唔知佢啲頭髮會唔會愈嚟愈少呢？
設計圖片及對白
張建宗尋日喺網誌話，自己同愛華嘅淵源可以追溯至三十年前嘅青葱歲月，想當年身形尚算健碩嘅佢，雖然只係一個東區民政主任，但佢已經非常關心區內弱勢社群。當時適逢港英政府要拆除柴灣道附近嘅石屋群用作房屋發展，中心主任盧龍光牧師就建議張建宗游說政府增撥資源，等佢哋可以服務更多有需要嘅區內長者。當年精力旺盛嘅張建宗於是跑數百級樓梯上山，去中心同盧龍光當面了解計劃詳情，之後就向政府要求興建新服務大樓。
標準工時及輸外勞有排煩
時至今日，張建宗當年嘅滿頭黑髮已變得稀疏，當然佢要處理嘅政策並唔係起個新服務大樓就算，而係處理輸入外勞同實施標準工時等燙手山芋。早前政府發表人口政策諮詢文件談及香港未來或要考慮輸入外勞，畀勞工界狂轟政府根本係想輸入外勞，而工聯會即時表明強烈反對，但富貴黨就支持政府按需要針對性及彈性輸入外勞。工會同商界嚴重分歧，咁張建宗又點擺平呢？
喺標準工時討論方面，標準工時委員會雖然已經開咗幾次會，但仍然未能就原則性問題達成共識，正式諮詢睇怕都係遙遙無期。仲有咁多棘手問題未處理，相信張建宗有排煩，爆頭諗計先得嘞！
