城中鏡：李彥宏身家越過宗慶后
近排科網股炒到飛起，喺美國納市掛牌嘅中文搜索引擎龍頭百度，由年頭到依家股價已飛升咗六成三，帶挈創辦人李彥宏財富都急升到去一百一十九億美元，根據最新嘅「彭博億萬富翁指數」，佢嘅淨身價已超越咗娃哈哈集團董事長宗慶后，喺中國富豪榜上僅次於萬達集團董事長王健林，排喺第二位。
李彥宏
本港富豪榜成員一向穩定，尤其喺頭幾位嘅富豪，年年排名相差無幾。相比之下，內地首富就「短命」得多，好似福布斯中國富豪榜咁，喺最近八年已經換咗七個首富。李彥宏喺一個月前公布嘅福布斯中國富豪榜上，就仲排緊第三位，但係如果根據每日按市場價值更新嘅「彭博億萬富翁指數」，佢嘅身家喺今個禮拜二已升咗上第二位。至於前首富宗慶后，就喺短短三個月內，畀王健林同李彥宏相繼爬頭，跌咗落第三。
