近排炒到香噴噴嘅騰訊，究竟幾錢先至係頂？相信股神都答你唔到，但就肯定帶挈公司班董事發達，好似騰訊獨立非執董李東生，啱啱沽清手上淨番嘅四萬股騰訊套現一千六百七十四萬元，騰訊執董Martin劉熾平就沽十萬股，而且個價仲靚，四千二百零三萬元袋袋平安，分分鐘係今年嘅打工皇帝，而最令人眼紅嘅，係Martin手上仲揸住價值超過三十七億七千萬元嘅騰訊股票！

劉熾平

翻查一三年嘅聯交所資料，Martin喺五月以三十三元五仙行使一百五十萬股騰訊，又喺八月底以同價行使五十萬股，然後佢「慢慢搣」，由五月至八月分四次，每次十萬二十萬出貨，個價大約由三百零三元至三百五十六元左右；十一月十九日再以平均價約四百二十元沽十萬股，套現約四千二百零三萬元，雖然佢响十月二十一日騰訊創四百五十五蚊歷史新高時無沽，但今年共五次已經袋咗近二億銀！

第一手消息請下載on.cc東網iPhone/iPad/Android/Windows Phone Apps