城中鏡：為慈善去到盡 樂「懿」反串

喺日前一個慈善機構舉行嘅酒會，又見到籌款騷常客、恒生銀行前女大班Margaret梁高美懿，佢話往年都係打吓高爾夫球、參加慈善步行「撲水」，似乎冇乜新意喎！有冇諗過開金口唱歌增加籌款「叫價力」呢？佢謙稱唔想唱歌趕客，舞技亦被一眾社交界舞王舞后比下去，無謂獻醜咁話。

陳祖澤扮過女人

之不過，講起戲劇，Margaret即時雙眼發光，原來佢鍾情舞台劇，笑言過去冇人向佢招手，所以一直收收埋埋冇人知佢呢方面嘅喜好，坦言如果有機構邀約佢，觀眾又唔介意佢矮，反串做男人都仲得，總之為慈善，要佢扮乜都得，因為反正都係玩之嘛！Margaret開到聲，相信好快有團體爭相向佢招手。咁啱鐘錶界老行尊孫秉樞都在場，原來佢亦係慈善界嘅老行尊，多年來兼任多個慈善團體嘅管理層，唔知佢會否考慮搵Margaret合作搞吓舞台劇籌款呢？

至於唱英語粵劇最耍家嘅香港賽馬會前主席陳祖澤，過去為咗籌款已多次扮包青天、清兵，連女人都扮過，所以扮嘢一向難佢唔到。佢仲承諾為咗慈善，唔介意多啲嚟密啲手，密密扮嘢籌多啲善款。香港足球總會名譽副會長余錦基就話，舞台演出唔係咁啱佢，上台獻唱兩首金曲都仲得，總之為慈善，大家都樂意有錢出錢，有力出力咁話。