香港吸煙與健康委員會,前日建議政府喺明年二月公布嘅財政預算案,大幅增加煙稅一倍,有輿論話咁樣會增加市民買私煙嘅誘因。本身都係煙民嘅立法會出進口界議員「象哥」黃定光,尋日喺大會上提出口頭質詢,問政府打擊私煙行動次數、檢獲私煙數量同應課稅總值,之後仲問民間舉報私煙成效如何。

黃定光

陳家強

雖然打擊私煙同宣傳拒絕買私煙嘅工作,係由食物及衞生局局長高永文負責,但由於象哥嘅問題涉及近年檢獲私煙數量及應課稅總值,政府就派咗負責稅收嘅財經事務及庫務局局長「傻強」陳家強去立會回應。原本傻強照讀稿都算答得有紋有路,話經海關加強打擊私煙活動後,售賣私煙黑點已經幾乎絕迹,本年至今有關私煙嘅投訴個案比舊年同期大減三十四個百分點,認為私煙活動已漸趨收斂。

議員陳志全批評當局瘋狂增加煙稅,搞到「富人飲平酒、窮人食貴煙」,問當局有冇預計加煙稅後會令幾多市民改食私煙。議員謝偉俊就話依家政府容許用罰款代替訴訟,間接令檢控數字減少,質疑傻強有心誤導立會。傻強初時都厚住面皮話增加煙草稅係國際慣常做法,但畀議員再三追問後都決定扯白旗投降,問可唔可以用書面方式補充答案,慘被玩足二十幾分鐘先可甩身。

第一手消息請下載on.cc東網iPhone/iPad/Android/Windows Phone Apps