中銀保誠信託行政總裁陳禹昌,舊年用咗二十幾小時跑畢全程毅行者,佢今年冇份跑,因為隊友無預佢喎!齋睇唔落場邊度過癮,原來佢早排都積極練跑,為咗十二月一日澳門全馬備戰。

陳禹昌出名跑得,而且參加好多大大小小嘅賽事,以前仲玩過兩次毅行者,無花無假,真係二十四小時內跑足全程o架!以為佢今次「玩硬」毅行者喇,點知今年班隊友唔預佢。鬼咩,毅行者嘅步速要差唔多先得,班隊友梗係嫌陳禹昌跑得太快啦!

但係陳禹昌話齋睇都相當勞氣喎!點解?之唔係賽事頭段封咗路,參賽者去唔到第一個check point拎水,兜個大圈,體力固然係用多咗,最弊係失咗預算,唔夠水飲,搞到有幾個朋友中暑呀!

今場賽事參加唔到唔緊要,因為佢嚟緊就會參加澳門全馬,聽講佢早排已經秘密練兵,依家就可以休息吓,希望以最佳狀態應戰!

第一手消息請下載on.cc東網iPhone/iPad/Android/Windows Phone Apps