政壇：波波「吳得掂」上身 死撐搵食車夠位泊

立法會航運交通界議員易志明尋日代表業界，向政府反映唔少商用車因為泊位不足，而被迫跨區或喺偏遠地區泊車，不但費時失事兼嘥油錢，仲製造更多廢氣污染環境，愈講愈大鑊。有議員仲列舉上海街、漆咸道南嘅泊位一樣嚴重短缺。

但係發展局局長「波波」陳茂波拒絕接受現實，指全港除咗中西區車位比較緊張外，其他區車位供應足夠咁話。咦！聽落咁熟口熟面嘅，咪同被嘲為「吳得掂」教育局局長吳克儉早前死撐全港幼稚園學位充足，而被全港家長炮轟嘅言論一樣？

吳得掂早前計錯數又唔肯認，搞到一鑊泡，北區家長仲上街遊行抗議，要求政府保障佢哋嘅仔女當區入學，跟住政府連番出招補鑊，依家都未收科，但係波波竟然冇吸取教訓，仲好似吳得掂上身咁回應。

劃五地建車場得把口

跟住波波又解釋，係咪興建停車場需要考慮該區停車場嘅使用情況、市民支持度同會唔會增加該區車流量造成擠塞。一聽就知，佢喺度耍官腔喇，但又冇提出任何改善建議喎。

老實講，興建停車場講到尾都係商業決定，政府口口聲聲劃出五幅地興建多層式停車場，但一直只聞樓梯響，未來仲有政府停車場遭拆卸同轉為私營，全港車位足夠呢番言論睇怕都頂唔住，小心步吳得掂後塵，被全港車主同搵食司機聲討啊！