善長捐地增宿位 港府安老徒口惠
新年有新年願望，聖誕節有聖誕願望，原來喺「長者日」祈願一樣咁靈驗喎。呢，前日長者日，公公婆婆雲集政府總部請願，要求增加資助安老院宿位，話口未完，即刻傳出有新地皮建院舍嘅好消息，你話係咪心想事成吖？不過咁，今次帶畀長者希望嘅並唔係港府，而係一名善長，證明官僚無能已成事實，實非人嘅意志可以轉移。
嗱，呢位捐地善長就係人稱「四叔」嘅恒基地產主席李兆基。四叔繼早前捐出一塊元朗農地畀房協興建細單位「上車盤」後，家陣再接再厲，攞出真金白銀自購恒地一幅屯門藍地十萬呎土地，轉贈博愛醫院興建長者護養及護理院舍，預計最多可提供二千個宿位，最快二○一七年入伙。當局亦證實，收到博愛醫院興建安老院嘅資助撥款申請，話歡迎有關捐地行動喎。
捐地安老嘅善舉的確多多益善o架。大家知啦，現時資助安老宿位嚴重供不應求，每年喺輪候期間含恨而終嘅老人多不勝數，如果單靠港產官僚撥亂反正，蛇都死喇。尤其係資助宿位短缺造成一個聳人聽聞嘅恐怖局面，就係私營安老院濫竽充數，風燭殘年仲遭虐打凌辱嘅醜聞不斷發生，難得依家有人愛屋及烏，捐地之餘念及一班老友記嘅福祉，以增加宿位減少長者抱憾而逝嘅悲劇，呢個都算係善舉中嘅善舉咯。
唉，講到呢度，太一叮真係百感交集。眼見資助宿位增加，以後輪候時間有望縮短，固然為貧苦長者開心啦，但睇到港產官僚咁無用，一而再要外界打救，實在為佢哋難過囉。喂，建屋安民唔係政府嘅責任咩，點解失敗到要善長捐地？老有所養唔係官老爺嘅職責咩，點解失禮到要社會分擔？套用近日熱爆網絡嘅議事堂金句，人哋一出手就為資助宿位增加二千個，而港府未來三年先至預計增加一千七百個，真係收皮啦！
即係咁，知恥近乎勇。港產官僚真係要好好檢討，仲要係深切檢討嗰隻。遠嘅唔講吖，新界東北發展計劃阻力重重，發展局局長陳茂波日前落區時受到一班老友記熱情招呼，石仔嶺十六間護老院舍要求不遷不拆，擔心現時逾千名長者遭安置不當，無「家」可歸。如果當局仲唔發憤圖強，度橋覓地建屋建院舍，萬一激到連老人家都抬棺材上街，咁就大吉利是喇。
一句講晒，善長捐地安老既係人間有情嘅表現，同時亦係官僚涼薄卸責嘅寫照。其實，如果港產官僚真係闢地無計咯，咪向人哋請教囉，無腦得嚟仲要無心反省，呢啲咪係無能中嘅無能囉，叮！
