SUN驚奇：螢光顏料紋身隨時爛肉
只會在夜場紫外光燈下現形的隱形螢光紋身，近年在歐美、新加坡及內地受年輕人追捧。不少內地紋身店紛紛推出螢光紋身服務，更有港人在低價吸引下北上紋身。記者直擊後發現，內地所用螢光顏料屬不知名牌子，成分不明。本港醫生直指將來歷不明的螢光顏料，紋入皮膚內難以取出，可致皮膚潰爛，隨時紋出爛肉。
紋身師向自己大腿照射紫外光，展示螢光紋身。
內地紋身師提供的兩支螢光顏料屬不知名牌子。
何佩瑜Jeana：「雖然螢光紋身幾得意，但紋身紋咗後難洗得甩，又會影響工作，紋咗就做唔到清純學生妹嘅角色，所以我唔會試。」
阮民安Tommy：「螢光紋身幾型喎！我會想去試，其實我都有紋過身喺啲冇人睇到嘅位置，如果個紋身去蒲時先見到，又唔影響做嘢，都幾好。」
多間內地紋身店都提供螢光紋身，價錢較一般紋身貴。
內地紋身店外，不乏顧客駐足觀看。
怕痛唔敢試
李小姐（學生）：「螢光顏料唔知有咩化學成分，注射入皮膚入面好危險，我又怕痛，一定唔敢去試。」
朱小姐（美容業）：「我唔夜蒲，所以唔覺得啲螢光紋身有咩咁特別，其實紋咗上去，以後老咗皺皮，個紋身會好難睇。」
隱形螢光紋身是將含螢光成分的顏料，刺入皮膚底層，造成紋身圖案，其色彩極淺，平日難以看到，但在紫外光照射下，就會顯現螢光效果。由於隱形螢光紋身平時紋而不見，吸引不少潮男及斯文女生嘗試，日常可逃避旁人眼光，在夜店中卻吸引眼球。
「螢光顏料入面，以無色嘅透明顏料最受歡迎，做嘅都係後生仔女，特別係女仔比較多。」本港紋身師阿明表示，螢光顏料已推出市場多年，但在港並不普及，與安全有關。
「之前有啲行家用過，但有啲螢光顏料含有水銀，對身體有害，好多紋身師都唔敢再試。」螢光紋身再次熱起來，全因為最近美國有大型公司推出螢光顏料，口碑不俗，本港紋身師認為比較安全，所以近期開始試用，「其他牌子，或者內地嘅顏料，就唔敢用，因為可能係有問題嘅次貨。」
記者前往港人北上消費集中地深圳東門，該地設有多間紋身店舖，透過中介人在街頭拉客。有多名中介人向記者兜搭：「紋唔紋身，好平！」並推介不同的紋身服務，「我地有紋身、洗紋身，仲有螢光紋身，啱晒你去夜場。」
紫外燈一照發光
中介人帶記者到附近商場的紋身店，店員即大力推介螢光紋身：「螢光紋身平時只會有一條好淺嘅線，但只要紫外光燈一照，個紋身就會發光。」紋身店負責人即場取出紫外光燈電筒，射向其腿上的日本鬼怪圖案螢光紋身，鬼怪的眼睛即時放光。「你睇！我隻腳嘅紋身，眼睛部分用咗螢光顏料。」
負責人又用手機展示他的螢光紋身作品：「好多人整過o架，仲有唔少香港人嚟幫襯！」當記者詢問螢光顏料會否被身體吸收，店員說：「螢光紋身可維持到六年，對身體唔會有害！」記者追問螢光顏料的牌子及有否安全證明時，店員只表示：「啲螢光顏料都係美國生產，好安全！」記者細看該支顏料，之後到網上搜查資料，發現美國並無生產有關產品，安全惹人懷疑。
記者走訪東門其他紋身店，大部分同樣推薦螢光紋身，價格比傳統紋身貴一倍，收費以面積計，一吋乘一吋面積，價錢約三百元人民幣，而每間店舖都稱螢光顏料來自外國。
香港皮膚科專科醫生史泰祖指，螢光顏料屬化學物，若對顏料敏感，刺入皮膚後難以清除，後果嚴重，他說：「化學物質搽喺皮膚上，如果有敏感都可洗咗佢，但刺咗入皮膚，就好難清除，最終敏感可以變成皮膚潰爛。」
香港專業教育學院沙田分校應用科學系講師周卓峰亦指出，因這類螢光顏料需要一定高濃度成分才可發光，若將成分不明的顏料刺入人體內，會對皮膚造成一定程度的損害，加上圖案要紫外光照射才會發光，但皮膚若長期接受紫外光照射，可能會引致皮膚癌，呼籲市民勿因貪靚而亂試。
