城中鏡：郭少明唔怕爭不輕敵
莎莎老闆郭少明同郭太好識做生意，每次業績會郭太都打扮到靚靚做生招牌，而郭生就落足嘴頭sell產品。尋日個記者會都唔例外，郭生話化妝品逐漸變成必需品，所以對經濟抗禦能力較強，而且莎莎成日引入新產品增加吸引力。
郭少明同太太都好識做生意，經常引入新產品增加吸引力。
講到阿信屋母公司CEC國際將會開化妝品店，仲針對低價市場，郭生就表示歡迎，仲話「有競爭先有進步，有新對手入嚟就證明呢個市場仲有得做，所以我哋莎莎係先鋒，就應該更加有信心做得愈嚟愈好」！佢話估計同阿信屋重疊嘅產品唔會超過百分之十五，而且莎莎產品價格範圍好闊，所以唔擔心會產生價格競爭，亦都唔會因為咁而去改變多年嘅策略。最後佢仲補充，「我哋唔會輕敵，如果有好嘅地方會改善同學習」。
