城中鏡：吳傑莊搵易建聯鬥高
香港青年聯會主席霍啟剛同副主席Johnny吳傑莊，日前雙雙榮膺首屆「世界廣府人十大傑出青年」，一齊赴廣州出席頒獎禮。同場獲獎仲有身高達二點一米籃球巨人易建聯，由於佢高度超乎常人，搞到Johnny都爭住走埋去度高，場面搞笑。見到高人，Johnny冇請教增高餐單，反而係好奇對方出入門口會否經常撞頭，易建聯對問題見怪不怪，淡然一笑，似乎已被太多人問過！
吳傑莊（右）巧遇巨人易建聯，第一時間拍埋去度高度。（受訪者提供）
講番今次傑青選舉，候選人多達四百人，最後選出二十強鬥一番，但決戰方式好特別，大會來一場「公示」，即係在網上公開二十位候選人嘅資料，由百多位團體代表選出「十大傑青」。Johnny話賽前唔知有「公示」呢個環節，知道後壓力好大，擔心人人知道佢參賽，選輸就真係好瘀。幸好最後不負所望，家人同朋友都戥佢開心。
