SUN搞作：少膽虫手記：孖筋黐實咗

少膽虫一入公司，即覺背後有寒意來襲，轉頭一望，就見淫賤黎對住少膽虫「舔舔舌」，「腦細又肚餓，又要等人餵飽佢？」少膽虫急急找掩護。「企喺度！做咩見到我就走？」少膽虫聽到腦細呼喝，死死地氣停低，「邊有呢？咁啱人有三急，要入廁所。」淫賤黎一聽，頓時兩眼發光，「入廁所？『膠膠膠』！」肥大舌頭邊說邊吐。

「腦細，生理需要啫，做咩話我？」少膽虫不甘捱鬧。淫賤黎無名火起，一臉不耐煩︰「仲講，『膠膠膠』喇！」少膽虫忍咗咁多年，今日終於忍唔住，「好喇喎，鬧夠未，屙個尿都要被你鬧！」閃電之間，又係一下耳光，「咪叫你去囉！幾時有鬧你？」淫賤黎咆哮。

少膽虫冤屈道︰「明明就話我膠……」只見淫賤黎搖搖頭，「我係叫你快啲去（go），唔通針脷針得多有後遺症？難怪呢排同美帝大人見面，佢哋都話我發音唔正，話我1999喇……唔通要剪脷筋？」少膽虫見機會又嚟，「腦細，不如我幫你睇吓喇。」