政壇：搞搞政：遊玩變考察金民豪新招益議員
多名行政會議同立法會議員早前被揭發接受航空公司款待，帶埋家屬豪遊法國接收新飛機事件，被批評有利益衝突之嫌，搞到唔少機構都怕怕，唔敢再亂咁款待議員。不過，香港迪士尼樂園度假區行政總裁金民豪就出新招，招待議員入迪士尼「茶敍」同「考察」，表面上「考察」時間得個半鐘，但據聞考察完之後仲可以繼續留喺樂園內作「深入了解」。
舊年請十六位議員參加「黑色世界」活動兼食埋自助餐嘅香港迪士尼，今年冇再請議員參加萬聖節「哈囉喂」活動，有議員就估計可能係因為暑假爆出豪遊法國事件而縮沙。不過，為咗同班議員增進溝通同推銷包括暫名為「鐵甲奇俠」總部等幾個擴建園區，金民豪就出新招，喺十二月一日邀請班議員去迪士尼樂園酒店茶敍兩個鐘兼入園考察個半鐘，唔再好似以前咁畀張入場券議員入園任玩。
雖然自助餐變茶敍，全日任玩變個半鐘考察，但據了解，議員當日一樣可以帶家屬、朋友去「感受」樂園設施，「考察」完之後亦都可以繼續留喺樂園深入了解嘅，相信議員同親友同以前一樣歡欣無限。
