政壇：機管局董事會 火花四起
日前有傳機場管理局（機管局）董事會火花四起，主席Marvin張建東同董事Vincent羅康瑞因為機場島上用地問題嗌交炒大鑊，仲傳出Vincent一怒之下劈炮辭去董事職務添。不過，經我哋尋日四出刮料後，得悉原來Vincent唔係辭去機管局董事，只係辭去基建規劃委員會主席一職，但足證兩人不和唔係無風起浪。
傳聞張建東（圖）同羅康瑞因為機場島上用地問題嗌交炒大鑊。（資料圖片）
傳為機場用地爭拗
話說上次機管局董事局開會，傾緊點樣發展機場島上嘅高爾夫球場用地，本身係基建規劃委員會主席嘅Vincent覺得應該地盡其用，但顧問報告提供嘅資料唔足以說服董事局拍板，因為人流、營運模式等等資料都缺乏，最後Marvin決定押後再討論，等顧問提供多啲資料先再作決定。
不過，據聞呢句說話激嬲委員會主席Vincent，佢覺得呢個項目係佢負責，應該由佢話事，但Marvin又覺得佢係機管局主席，有權做最終決定，兩人就咁嘈起上嚟，最後Vincent拋低一句「有啲人唔合作」，隨即表示辭去委員會主席一職。尋日機管局再開董事會，會上冇人再提辭職一事，但據聞開完會後，Vincent同Marvin兩人單對單傾咗好耐，唔知兩人最後傾成點呢？
