實施咗差唔多年幾嘅買家印花稅（BSD）「辣招」，立法會依家仍然審議緊呢條法案，尋日個會議就有好多議員擔心有人利用「雙非嬰兒」名額買樓逃避BSD，認為係大漏洞，會令成條法案盡廢。雖然政府反駁話過去兩年只得三宗有關個案，但班議員依然死咬唔放，足足拗咗兩個鐘先至收工。

議員涂謹申變咗泛民的重炮手，佢問如果三唔識七都可以做信託人，咁個個都走去搵雙非嬰幫手買樓，然後賺到錢兩份分。政府就話稅務局會把關，總之唔會隨隨便便批出豁免。點知呢句話激嬲其他議員，地產及建造界石禮謙就話，任由稅務局決定邊啲人豁免，而唔係根據法律辦事，咁稅務局咪變咗「陪審團」？政府就回應話，如果市民唔滿意稅務局決定，可以透過法庭訴訟喎。

呢個時候工業界梁君彥加把口話：「你哋政府咁鍾意叫人去法庭，咁要立法會嚟做乜？」最後旅遊界姚思榮都話咪煩啦，不如一刀切將十八歲以上人士買樓先獲豁免，咁咪一天光晒囉！其實班議員講到個漏洞好似洪水猛獸咁，政府又認為無問題，如是者無止境咁爭拗落去，莫非班議員想「拉布」，想逼政府減辣？

第一手消息請下載on.cc東網iPhone/iPad/Android/Windows Phone Apps