政壇：接掌阿里 陸兆禧轉高調
接任阿里巴巴首席執行官半年時間，陸兆禧雖然唔似馬雲咁金句不離口，但佢平和同務實嘅性格一樣令外界印象深刻。佢最近接受外電訪問，講起自己喺短短十五年內，由一個小小酒店接待員，到執掌中國最大電子商務公司嘅職業歷程，佢話馬雲會跳出框架向前看，而自己就專注眼前，其實大家性格好互補。
陸兆禧（右）話同馬雲嘅性格好互補。
答漏題無緣讀建築
估唔到陸兆禧畢業之後嘅第一份工，原來係喺廣州嘅酒店做接待員。直至到幾年後加入阿里巴巴網絡任職華南區銷售主管，而每次馬雲去廣東，陸兆禧就負責揸車帶他去見客戶同周圍演講，靠喺車程裏面嘅交流，大家開始真正咁了解對方，從此，陸兆禧開始踏上青雲路。
陸兆禧話當年大部分時間都係馬雲講，佢聽；馬雲瞓，佢揸車。就算馬雲今年二月約佢去上海外灘半島酒店飲茶，提出要佢接任阿里CEO嗰次，一樣係九成時間係馬雲講嘢，跟住佢答「好」。不過，依家伴隨馬雲卸任CEO，領軍重任已經落喺陸兆禧身上，包括帶領集團整體上市。陸兆禧話已經做好準備改變低調作風，更多咁去面對公眾，但係需要時間，同埋要完善自己先喎!
另外，佢仲話自細嘅夢想同互聯網完全無關，最想做嘅係建築工程師，可惜當年高考答漏咗條題目，令佢無緣建築系，轉咗去讀酒店管理，但冥冥之中，佢最終加入阿里，仲做埋CEO添!
