政壇：爭地權大龍鳳齊齊做戲
過去二十幾年來未試過喺立法會提出修訂嘅新界鄉議局主席劉皇發，十二月會提出「處女修訂」，要求將大浪西灣剔出郊野公園範圍。由於要分組點票通過至得，只要泛民主派齊齊整整就可以否決發叔修訂。雖然發叔、建仔同一班環保團體已預知投票結果係點，但仍然樂意搞場大龍鳳，目的就係做畀自己支持者睇，以示「嗱！我已經做咗嘢喇！」
其實，建仔為咗穩固鄉事票源，基本上好大機會支持發叔修訂，但由於距離投票仲有一段日子，佢哋仍然要扮聆聽民意，所以尋日就約見由二十幾個環保組織組成嘅保衞郊野公園大聯盟。會議過後，當然雙方都說服唔到雙方啦，因為大家一早知道對方立場，大聯盟代表周月翔就話對建仔不寄予厚望，因為一早知對方點諗，尋日只係盡量游說。
建仔嘅投票立場好明顯，該黨議員EQ葛珮帆身為「環保鬥士」，當然扮晒嘢要企喺西灣村村民嗰邊。所以成個會面目的，根本係畀雙方展示自己有盡過力聽對方意見，過程先至係最重要。
向選民或支持者交代
同樣有咁想法嘅，當然包括呢場大龍鳳始作俑者發叔啦，因為發叔本身都唔想搞到咁大件事，奈何一班地區鄉紳頭目好大反應，發叔惟有喺議會提出修訂，算係做啲嘢安撫一班鄉紳，到時修訂被否決，都可以將矛頭轉向一班泛民議員，擺出一副事不關己嘅樣。所以話，呢場大龍鳳嘅投票結果根本唔太重要，最重要就係各方持份者都落力做戲，等自己可以向選民或支持者交代。
