政總十六萬項甩漏 貪曾十二萬分醜陋
「門常開」變「醜常來」，添馬艦政府總部耗資五十四億元興建，本來應該係富麗堂皇，宏偉壯觀，點知喺前特首曾蔭權爵士趕入伙下變成豆腐渣工程，爆水管、冧樹木、漏水、假天花飛脫、散播退伍軍人症惡菌等等，簡直烏龍百出，笑話不絕。眨吓眼，政總入伙兩年嘞，如果大家以為噩夢已經結束，咁就太天真嘞，以上嘅荒謬情節只不過係冰山一角咋。
嗱，最新一份審計報告踢爆，門常開工程粗疏，甩甩漏漏，前年十一月大樓移交程序大致完成時，居然仲有近九萬項缺漏未完成，真係講出去都嚇死人。更嚇人嘅係，大樓竣工兩年後，缺漏唔只冇減少，反而進一步增至十六萬三千多項，問題直到今年八月依然未解決，包括大雨後滲漏、太陽能熱水系統損壞、閉路電視系統影像不穩定等等。大家話嘞，五十幾億搞出一幢咁嘅爛尾樓，係咪國際笑話吖？係咪浪費公帑吖？
不過咁，講到笑話咯喎，點都唔及門常開新張入伙即變惡菌溫床咁滑稽。審計報告揭露，原來大樓食水供應系統使用前根本未經完全消毒，結果搞到本身患有腎衰竭嘅前教育局局長孫明揚染上退伍軍人症，當時幾乎要提早退伍咁滯。其實，不潔嘅唔止食水，仲有官德吖。貪曾貪威識食，揮霍民脂民膏，買一張椅咋，就花費公帑一萬四千蚊，淨係豪買名牌椅，一年埋單超過四十五萬，簡直豈有此理！
所以話，金玉其外，敗絮其中，政總千瘡百孔，咪就係貪曾七年施政嘅縮影囉。嗰張豪華座椅反映佢作風貪婪，嗰個回本期長達一百七十六年嘅行人天橋照明系統代表佢施政華而不實，而滲漏處處就象徵佢管治千瘡百孔。當然啦，貪曾好大喜功，為咗趕及任期完結之前入伙，等自己可以主持啟用儀式攞威，滿足虛榮心，唔理係九萬項缺漏定係十九幾萬項缺漏，死催爛催，死趕爛趕，結果遺禍無窮，害人害物。一滴水看世界，政總嘅亂象，正係貪曾七年禍港嘅寫照，今時今日嘅社會永無寧日，唔係民怨爆煲，就係施政甩漏，唔係包圍政總，就係包圍立法會，今屆政府真係多得佢唔少。
一句講晒，政總十六萬項甩漏，貪曾十二萬分醜陋。唔該廉政公署速速依法辦事，將呢個貪官繩之以法，一棟爛透嘅政府總部已經夠篤眼篤鼻，若然腐敗不堪嘅貪曾繼續逍遙法外，唔只有礙觀瞻，簡直污染社會吖，叮！
