香港人一直引以為傲的，也是傲視中國大地上的，就係香港「以法為先」，仲講「法治精神」，一切「有法可依」、「重視法紀」，法律之下，人人平等。不過，近年，這個讓港人驕傲的「非物質文化」，已成「遺產」。

我好多時都想不透的，點解，香港通街違法之事，人人匿埋眼都望見的，而香港政府有關部門卻總係發雞盲咁，乜都睇唔到嘅！

嗱！巨型及違法招牌無人去拆，原來係屋宇署人手不足喎！咁路邊大牌檔將枱櫈橫放阻街，日夜如是，何解卻無人執法？依家條條街都戙滿宣傳的易拉架，呢個廢柴垃圾政府亦手足無措，唔知點負責，原因係：易拉架「拉高」同「唔拉高」，係由唔同的政府部門處理（嗱！據聞係咁咋！請有關當局解釋和賜教），但係「真確的」，係呢啲易拉架，只要無人看管的話，若「執法人員」覺得佢阻街，便會貼上警告貼紙，二十四小時後，仍見同一位置沒人收拾，才將之沒收；不過，只要有人將呢個貼上警告語的易拉架移位，前後多過五厘米的話，則不算違法，無人可以「收歸國有」！呢個係乜嘢法制呢？邊條友訂出嚟，益啲「大財團」o架呢？

嗱！日前，又有傳媒揭發好多公屋未補地價改為劏房，還公然在網上放租，更有地產代理做中介人添！點解每事都係外間平民百姓比政府早知先，待揭露後，垃圾官員（執法者）才如夢初醒，按圖索驥去辦案o架呢？

最近，在旺角亞皆老街先達廣場旁的一間大型電器連鎖店門外，日日都有批「小販」踎在路邊，放一個紙皮箱，便做iPhone大買賣，差人經過都睇唔到，佢哋知唔知電話買賣係要攞牌o架？點解又無人執法嘅？

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府