城中鏡：九倉繪畫賽啟動 名家談創意
第三屆「九龍倉全港中學生繪畫比賽」尋日舉行啟動禮，擔任評審嘅著名藝術家莫一新、薩凡納藝術設計學院（SCAD）香港分校副總監柏君予現身大談創作心得，上屆得獎學生亦齊分享參賽體驗，現場仲有二十位中學生即場創作立體字，氣氛熱鬧。
李玉芳（中）聯同莫一新（右）及柏君予（左）主持繪畫比賽啟動儀式。
創造唔少雕塑嘅莫一新話，喺香港搞雕塑創作嘅難題，係空間狹窄令作品尺寸受限制，事關藝術工作室多數喺工業大廈，所以要考慮貨車及貨升降機嘅大細，有時作品仲要斬件方便搬運，唔似外國咁自由。講到規管二次創作問題，佢認為有關規管對創意工業有負面影響。
九龍倉集團執行董事李玉芳話比賽歡迎全日制中學生參與，希望鼓勵佢哋發揮創意，培養對藝術文化嘅興趣，從而推動本地藝術文化發展。得獎者除可獲書券同現金外，亦有機會參與短期藝術課程及海外藝術交流活動，首十八名同特別表揚大獎得主更可向九倉申請獎學金，用於修讀與藝術有關嘅學士課程。
