城中鏡：小吉明眸靠補水
支持內地白內障患者復明嘅「健康快車」，日前舉行一年一度籌款晚宴。創會主席「小吉」方黃吉雯響應大會「白色的高貴」主題，穿上雪白喱士晚裝，並黐上一排亮麗眼睫毛，雙眼亮晶晶。原來小吉護眼有秘方，每日勤滴滋潤眼藥水，等明眸無咁易攰喎！
方黃吉雯（左）同中國光大控股執行董事兼首席執行官陳爽（右），均努力為眼疾患者綻放光明。
「媽打」李麗娟競投墨水筆兼買慈善獎券支持健康快車，愛心爆棚。
圓玄學院副主席湯修齊同兒子湯德安（左一及二）投得智能手機賀媽咪生日（右）。
小吉十幾年前做咗激光矯視手術，分外注重護眼，出街例必戴太陽鏡。講完護眼，不忘晒吓湊大「健康快車」嘅成績表。佢話火車醫院已增至四列，又有五十一個診症中心遍布全中國，今年已吸引來自各地共五十位眼科專家親往交流，期望醫療團隊繼續壯大，造福更多病人。
當晚政商界名人紛紛買枱支持，健康快車主席范徐麗泰帶頭捐出銀色智能手機，以及限量版墨水筆，呢支筆係紀念已故摩納哥王妃嘉麗絲姬莉（Grace Kelly），好矜貴。范太話年輕時係Grace Kelly影迷，早前友人送贈呢支筆，本來唔捨得割愛，但諗深一層，捐出來幫人意義更大。
媽打鍾情儲靚筆
人稱「媽打」嘅民政事務局前常秘李麗娟第一時間出價七千三百元競投支筆，可惜最後被一位印度善長投得。媽打慨嘆現代人好少執筆寫字，佢就鍾情寫心意卡送贈好友，習慣多年不變，所以收藏唔少靚筆寫卡，分外真情流露。
