政壇：搞搞政：施政報告諮詢泛民播帶兼離題
呢排特首CY梁振英同財爺鬍鬚曾陸續會見立法會各黨派及社會人士，就施政報告及財政預算案諮詢意見。但經常批評官員係「人肉錄音機」嘅泛民議員，近日向特首表達意見時經常離晒題不特止，同樣係「播帶」表達意見。
尋日輪到公文袋嘅立會議員見CY，黨魁「袋巾傑」梁家傑喺會後話，佢哋喺會上特別關注三個議題，分別係西環干預特區內部事務，又提及免費電視發牌一事，仲要求CY搞好政改，如果唔係就樣樣都搞唔掂，但佢不滿CY對於三樣嘢都冇正面回應。梗係啦，CY同鬍鬚曾一早講明會面係聽取各界意見，一般都唔會就見面人士嘅意見作出回應，當收集所有意見後，用以制訂施政報告同預算案。
其實公文袋都準備咗成五十二頁嘅建議書，但講得最多就係免費電視發牌，唔知同施政報告同預算案有乜關係呢？難怪CY要睇錶喇！但公文袋議員仲未自覺提出嘅意見離晒題，仲話CY睇錶唔恰當，換轉喺立會，早就被主席打斷發言喇！
講開又講，袋巾傑早前喺區內張貼投票反對引用特權法查免費電視發牌嘅議員名單海報，佢竟誤將喺原議案投贊成票嘅黃毓民當成反對議案嘅一分子，激到毓民要出信投訴。雖然佢之後有去信毓民道歉兼承諾撕走海報，但政治嘅嘢好多時都會令市民先入為主，就算事後補鑊已作用不大，公文袋認真好帶挈。
