生日收到大大個花圈贈興，你會有乜感覺？呢個問題問Soho中國老闆潘石屹就最啱啦，事關佢尋日過五十歲生日，一朝早返到公司就收到個勁大個花圈，上面仲有埋「50」兩個字，搞到公司班手足同客戶都嚇親。邊個咁大整蠱？咪係有「任大炮」之稱嘅華遠地產老總任志強囉！

潘石屹五十大壽，任志強居然送花圈贈興。

潘總話幾日前任志強曾打過電話畀佢，問送乜生日禮物畀佢好，佢話最好乜都唔送。任總覺得咁樣唔得，最少都應該送個生日蛋糕，潘總就話自己唔食蛋糕嘅，不如送紮花啦！點知尋日朝早，「土豪」任總嘅花送咗嚟，唔係一紮咁小兒科，而係個紅色心形大花圈，嚇到啲同事同來訪嘅客戶都問，到底出咗乜事？

其實早喺今個月頭，任志強已喺微博話正煩緊要送乜禮物畀潘總，仲感慨認識「小潘」嗰時，佢都仲未到而立之年，一轉眼就過五十大壽啦，真係歲月如梭。尋日潘總同花圈嘅合照一擺上微博，即刻有網友讚任總「夠格調」，仲估個花圈應該係友情「至死方休」嘅意思喎！

第一手消息請下載on.cc東網iPhone/iPad/Android/Windows Phone Apps