政壇：唐明治贏最後一戰掛袍
曾於八十年代出任律政司嘅資深大律師唐明治，尋日出席許仕仁涉貪污案聘請英國大狀之上訴後，就正式宣告「掛袍」榮休。尋日佢喺「最後一戰」獲判勝訴，為其五十五年大律師生涯畫上完美句號。聆訊結束前，與訟雙方都放下各自立場，同上訴庭三名法官一齊祝福佢退休生活愉快。據悉唐明治榮休後仍會參與關於仲裁嘅工作。
唐明治（中）勝出最後一宗官司後，同翟紹唐（左）及石永泰（右）合照留念。
現年八十歲嘅唐明治於八八年離開律政署後，開始在港私人執業，呢個身份轉換成為大狀同僚調笑嘅對象。尋日代表大律師公會嘅資深大律師石永泰，喺正式陳詞完畢後開玩笑話，唐明治以前係律政司，依家私人執業，最後一宗官司又代表律政司，同業界公會打對台，由此可見大律師行業嘅「的士站規則」（意指禁止揀客）之可貴。
至於案件代表公眾利益發言嘅另一資深大律師翟紹唐，就憶述以前曾經擔任唐明治嘅副手，結果得到唐「帶挈」，獲得比獨自上庭更高嘅上庭費。佢相信現任律政司司長袁國強都曾享受過此額外福利云云。兩人嘅妙語連珠，為嚴肅嘅法庭帶來陣陣笑聲。唐明治退休後，相信可以同近日來港嘅太太、前行政及立法兩局首席非官守議員鄧蓮如勳爵，一齊返英國生活。
