政壇：立會宴領事 英菲齊被飛
好多國家都喺香港設立領事館，而立法會同班領事經常有交流互動，除咗足球友誼賽外，立會主席曾鈺成每年都會宴請各國領事，嚟緊下月就有一次，據講今次共請咗二十八位不同國家領事到立會參觀同午宴。我哋睇過份名單，發現有美國駐港總領事夏千福，連波蘭、北韓、科威特等駐港領事都獲邀請，唯獨係菲律賓駐港總領事同英國駐港總領事吳若蘭不在名單之列，唔通曾鈺成想大顯外交手腕，切割同菲律賓任何交流？
二十幾個國家領事聚首立會都算係「國際大事」除咗美、日、德、法等大國外，連以色列、巴基斯坦、秘魯、汶萊嘅駐港領事都會出席午宴，可以話係一次小型聯合國聚會。咁啱近日香港同菲律賓因為人質事件令雙方關係緊張，菲律賓政府又遲遲唔肯賠償同道歉，如果曾鈺成有心杯葛菲律賓，唔邀請菲律賓領事到立法會食飯，一啲都唔出奇。
純屬巧合？
不過諗落就發覺唔對路，香港同菲律賓關係差，但同英國關係又唔係咁差，點解吳若蘭無份呢？如果因為吳若蘭說三道四評論香港政務就唔宴請佢，咁又點解釋比吳若蘭更高調嘅夏千福又會在名單之上呢？
我哋問過立會秘書處，原來一切只係巧合，同外交層次絕無關係。因為曾鈺成一年會請班領事食飯兩次，咁啱吳若蘭同菲律賓領事喺今年三月份時已同曾鈺成食過一次飯，所以今次兩人不在名單之上。至於夏千福七月先上任，所以今次午宴有佢份囉！
