垃圾起火累街坊 環保不力佗衰家
烽火戲諸侯嘅故事係人都知，唔知大家有冇聽過「毒煙累街坊」呢？係咁嘅，日前本港打鼓嶺一個電子廢物回收場發生火警，滾滾濃煙唔止滋擾附近居民，仲飄到對岸嘅深圳市，事件經過本報報道，加上「on.cc東網」無遠弗屆嘅傳播，引起網民熱烈討論，有人話「香港毒煙累街坊」，有人話「垃圾煙反攻大陸」，不知幾熱鬧。
城門失火，殃及池魚，呢場回收場火警唔止殃及兩地居民，仲引起深圳當局高度關注添。繼當地政府發出警示後，又有二十幾位深圳人大代表聯署，緊急呼籲深港政府成立聯合調查小組，對香港垃圾污染事故嘅成因、危害進行全面評估。佢哋話喎，回收場燃燒釋放二噁英等致癌物質，對人體危害極大，要求港府立即或限時關閉鄰近深圳嘅所有廢物回收場同堆填區。以前講親空氣污染，港府就賴內地釋放工業廢氣，家陣風水輪流轉，輪到深圳投訴香港污染當地空氣，真係醜死怪咯。
太一叮唔知回收場起火對人體有幾大危害，只知道港府對回收業冇監冇管，放任自流。官僚口口聲聲重視環保及回收業，但得個講字，業界為咗節省成本，只好喺新界北部打游擊，利用荒廢農地改建回收場，結果因為防火設施嚴重不足，三不五時發生火警。就講今次起火嘅打鼓嶺吖，五年前亦曾發生回收場三級大火，消防員到場救火，附近居然連消防喉都冇，被迫接駁三公里長喉到場灌救，費時失事。
至於深圳人大要求港府關閉鄰近當地嘅垃圾堆填區，亦係一個尾大不掉嘅老問題。本港環境諮詢委員會早幾日開會討論將軍澳堆填區實施廢物分流計劃，唔少委員質疑全港七個垃圾轉運站已經接近爆滿，將軍澳堆填區日後只收建築廢料，勢必增加其餘兩個堆填區負擔，對周邊環境和交通造成更大滋擾，對屯門同打鼓嶺居民不公。
話時話，垃圾堆填區呢類厭惡性設施，無論設喺邊度都會遭到居民反對，港府源頭減廢大隻講，循環再用得把口，焚化爐又只聞樓梯響，搞到垃圾愈來愈多，冇計可施之下，一味硬銷擴建堆填區，唔止港人反對，隔籬深圳同胞都反對啦！
正所謂，垃圾起火累街坊，環保不力佗衰家。回收場七國咁亂，危機四伏，好心港產官僚的起心肝，諗辦法支持回收業，搞好源頭減廢先啦。如果唔係，回收場火燭殃及池魚事小，垃圾遲早逼爆香港事大吖，到時就唔只累街坊咁簡單嘅喇，叮！
