城中鏡：又一山人嘆港埋沒創意
政府成日都話要發展創意產業，日前喺個設計大賞頒獎禮見到人稱「又一山人」嘅視覺藝術設計師黃炳培，同佢講起香港地嘅創意文化，創作無數膾炙人口作品嘅又一山人感慨話，政府口講推動創意工業，但係未見熱情，眼見鄰近國家及地區一個個後來居上，情況令人擔憂。
又一山人嘆政府對文化創意產業欠缺理解同熱情。
入行逾三十年嘅又一山人話，香港依家倚重嘅經濟命脈例如金融及地產行業，長遠唔係咁可靠，急需推動創意工業作為未來經濟發展支柱，但係政府推動創意工業已經十年，卻未見增加對文化創意產業嘅理解同熱情。
又一山人咁關心時事，皆因佢嘅作品經常緊貼社會形勢，例如經典嘅紅白藍設計及去年梁振英參選特首時嘅「齊心」標誌，近期曝光率極高嘅免費電視牌照發牌風波主角香港電視網絡嘅標誌，亦係佢嘅作品。
