城中鏡：查太預言亞洲牛氣重
女性喺政經界嘅影響力愈來愈大，財富雜誌舉辦嘅亞洲最具影響女性論壇，就表彰曾有卓越表現嘅具影響力女性，香港方面有金融發展局主席查史美倫，查太獲獎可以話係意料中事，皆因佢對中港兩地嘅證券監管市場貢獻好大，問佢點睇經濟新形勢，查太話，相信未來二十年亞洲經濟增長將非常強勁，唔止中國，連印尼、印度、日本都會好「牛」！似乎查太睇好多個亞洲新興經濟體嘅表現喎。
查太睇好未來二十年亞洲新興經濟體表現。
除咗查太外，仲有唔少大家熟悉嘅女強人，包括「女股神」劉央、百度首席財務官李昕晢等。
李昕晢話，為咗提升內部的創新思維，公司特地成立咗一個機制刺激員工度橋，包括舉行寫程式比賽，每個星期所有工程師都會聚埋一齊，分組互相比併，行政總裁李彥宏亦會在場指導佢哋，勝出嘅組別仲會特別舉行慶祝活動，而有關嘅程式亦會放上百度使用。
