城中鏡：霍麗萍：爭產應會和解
已故全國政協副主席霍英東家族爆發第二輪爭產案，長房幾兄妹早輪喺法庭交鋒，霍家人每次露面都備受關注。日前霍家大小姐霍麗萍（Pat）拎住大大疊文件同手袋，出現喺中環ifc商場，問佢爭產官司會唔會和解，佢好大方咁話應該會！
霍麗萍行色匆匆步落ifc商場嘅扶手電梯，向的士站走去。
霍麗萍呢日下晝兩點鐘左右出現喺ifc商場，當時見佢急步行落的士站等車，神色凝重，直到我哋上前同佢傾偈，佢先至展露笑容。家族再爆爭產官司，身為霍家一員、甚至係今次風波中嘅一角，佢覺得啲拗撬會唔會和解呢？佢話應該會，仲話自己可以做和事老，始終大家都係兄弟姊妹咁話。
其實，今次阿Pat都加入原告行列，同埋細佬霍震宇同一陣營，狀告多名家族成員，霍麗萍今次嘅表態，係唔係另有玄機呢？
