因詐騙政府租金津貼搞到冇得撈嘅發展局前局長麥齊光因串謀詐騙租金罪成，被區域法院判佢監禁八個月、緩刑兩年，佢已經提出上訴，日前見佢一支公喺中環畢打街閒逛，途經幾個商場，既冇停低買嘢，又唔見佢四圍望，逛咗唔夠一個鐘就搭穿梭巴士返屋企。

神情呆滯

篤手機

托腮沉思

乜都冇買 搭車返歸

呢一日天氣唔係幾好，落住細雨，唔知係咪冇帶遮，只見麥齊光特登行咗落港鐵站，再經地下通道行去置地廣場。不過，入到置地之後，佢並冇行商店買嘢，淨係「幫襯」咗個洗手間，然後就行去太子大廈。但去到太子大廈都係行，逛咗一陣就經皇后大道中行去雪廠街，等穿梭巴士返去位於中半山花園台嘅屋企。

佢呢個一支公行程合共約四十五分鐘，但佢似乎唔係為咗shopping先出街，事關近一小時行程咩都冇買到。喺雪廠街等車期間，佢亦貌似神情呆滯，淨係間唔中頭耷耷篤電話，直至有個唔知係咪同佢住埋同一屋苑嘅女士同佢打招呼，佢先至面露笑容。

不過，呢位女士同佢應該唔係好熟，皆因巴士到時，佢哋都冇坐埋同一排，而靠窗坐嘅麥齊光就不時托腮沉思。

第一手消息請下載on.cc東網iPhone/iPad/Android Apps