政壇：搞搞政：林奮強撐新移民 狠批「源頭減人」
立法會議員范國威及毛孟靜等聯署「源頭減人」廣告，引起社會不少反彈後，前行政會議成員林奮強創立嘅智庫組織「黃金五十」尋日都發表人口政策報告，對香港勞動力不足嘅現況大表擔憂，仲話若非單程證計劃，香港早在十幾年前已經會出現嚴重嘅人口老化問題，同日本不相伯仲，林奮強嘅結論間接狠摑范國威同毛孟靜嘅倡議，林奮強仲警告，如果冇過去十多年來港嘅新移民，「我哋一陣食嘢同茶點都冇人服侍」！
設計圖片及對白
「黃金五十」尋日發表報告後，亦有安排茶點時間，林奮強呢句話本嚟係強調好多新移民喺飲食業提供服務勞動力，但聽落卻難免畀人「新移民服侍論」嘅感覺，好彩佢下一句就係「所以千祈千祈、記住記住唔好歧視新移民」補番數。
睇番佢哋尋日嘅報告，直言本地家庭嘅自願一孩政策窒礙人口增長，以致香港勞動力市場早已出現萎縮現象，如果唔能夠以吸引外來人才嘅方式補充，犧牲嘅只會係香港競爭力。
