政壇：唐偉章搶紅隧口擴校園
香港爆地荒，政府為建屋被批盲搶地，原來「搶地風」亦蔓延至大學院校，早前浸會大學師生捍衞九龍塘李惠利地皮，理工大學原來都(目及)實校園對出條紅磡海底隧道九龍入口處，想喺上面加建一個橫跨理大至東鐵紅磡站嘅上蓋平台，類似明渠加設上蓋咁發展。
唐偉章
唐偉章尋日出席校內每年一度嘅校長學生流會，有學生追問學校嘅發展情況。佢就提到紅隧入口收費廣場嘅空氣污染好嚴重，所以最近開始同政府溝通，想喺收費廣場上空加建上蓋，並將管道內汽車排出嘅廢氣集中處理後再排走，而所得嘅平台用地經綠化後可開放予公眾使用。唐偉章表面上講到好環保咁，但佢就笑笑口入正題話：「咁我哋都有私心嘅。」就係想申請將部分平台空間用來興建運動場等學校康樂設施。
不過，呢個建議就變相加長咗紅隧管道，將來每日逾十萬架次嘅車輛要喺管道內排隊到收費廣場畀錢，除非管道通風及廢氣排放系統做得好，否則司機們要被迫焗住吸廢氣。再者，喺紅隧收費廣場上空加建上蓋，造價非常昂貴，呢筆金錢係咪要由納稅人找數呢？抑或係理大自己籌錢興建呢？將來嘅維修費又係邊個畀呢？
