政壇：鄧蓮如罕有現身避論政
香港青年協會尋日搞咗個「香港青年服務大獎」頒獎禮，好耐無現身嘅前行政立法兩局首席非官守議員鄧蓮如（Lydia）勳爵同丈夫唐明治都罕有出席。不過，Lydia避談現時嘅政治局勢，只係一臉優雅笑容應對。場中焦點之一係電視發牌，對於行政會議召集人林煥光日前要求政府檢討免費電視發牌過程，商務及經濟發展局前局長馬時亨好搞笑話：「三個字！不予置評！」明顯跟風玩馮煒光「三個字」句式。
鄧蓮如（左）與丈夫唐明治出席青年活動，拒談香港政事。
另一行會成員陳智思聽到「林煥光」三個字，就話：「林煥光我唔講」，隨即轉身走人。講番個頒獎典禮，經過嚴格甄選後分別有五位青年獲獎，其中一位得獎者鄧敏琳上台時，就乘機向頒獎嘅特首梁振英（CY）表達意見，佢話自己成立公司推廣「惜食」文化，期間見到好多不公義現象，望CY可聆聽青年意見後先至制訂政策。
