政壇：立會示威文化超英趕美
立法會議員近年有個新趨勢，開會時經常喺議事廳展示大型標語或示威物品，書法、橫額、奶粉、手推車、就連義肢都有，呢啲情況喺大會或特首答問大會時尤其嚴重，有時誇張到連後排議員都忍無可忍。立法會議事規則委員會尋日討論係咪要檢討吓展示示威物品嘅規定，秘書處嘅資料搜集顯示，同歐美議會一比較，香港議會原來係最寬鬆嘅一個，唔知啲議員會唔會感嘆總算有樣嘢超英趕美呢？
事件起於政務司司長林鄭月娥早前去信立法會，指有議員開會時爆粗，甚至投擲示威品，行為極不檢點，促請立法會檢討目前議事規則，阻止類似行為發生。委員會尋日開會卻發現，呢方面香港議會比歐美嘅更「自由」。有建制派議員就話，有需要限制議員發言時先可展示示威品，而且唔可以擺過界，以免令立會好似垃圾崗咁，泛民主派梗係反對，認為應該維持原狀，結果拗完又係得個吉。
