政壇：張華峰撐設酒店有私心
有近百年歷史嘅山頂盧吉道二十七號大宅有意改建成精品酒店，但建議就引來唔少反對聲音，金融服務界立法會議員張華峰尋日就力撐該處發展成精品酒店，佢嘅理據原來同自己有關。當選以嚟多次講及減肥大計嘅張華峰話，為咗減肥同運動，佢每逢周日都會帶同小狗上山頂行個圈，點知路程中卻無地方可供休憩，好多時行到抖大氣，希望有個歇腳兼歎茶嘅地方，所以支持上址發展酒店。
設計圖片及對白
喘晒大氣冇碇休息
張華峰呢個理由算唔算牽涉利益呢？如果呢個精品酒店發展計劃要提上立法會傾，佢使唔使申報呢？講番個發展計劃年初展開嘅諮詢顯示唔少區內人士反對，主要憂慮係盧吉道現有道路較窄，如果真係改建成精品酒店，區內交通即刻成為大問題，甚至出現堵塞添。記得公眾諮詢期滿時，就有區議員搵地區人士、行山人士甚至係遊客簽名反對，所以，呢個古老大宅改建精品酒店嘅計劃可唔可以落實真係好難講。
尋日同傳媒茶敍嘅張華峰又呻，做咗議員之後成日要端坐開會，佢惟有趁周日運動補番數，每逢周日，佢都會同小狗charles上山頂散步，有幾次經過盧吉道時已經喘晒大氣。講到呢度，張華峰又補充，有時隻狗都唔夠佢行得快喎，力證自己運動量唔細。
自從金管局代表團早排上北京講到人民幣兌換上限後，業界都好關注件事，張華峰估計，明年一旦取消港幣同人民幣每日兌換上限，最大贏家實係港交所，咁現時係咪入市時機？佢就叫大家唔好短炒，但如果想投資可以留意下零售股同出入口股，因為美國經濟慢慢復甦，加上大環境無乜負面因素，長線投資可以一試喎。
