城中鏡：馮少雲零租撐原創時裝

喺租金勁升底下，時裝設計師縱有澎湃才華，要開舖打響自家品牌唔容易。東華總理Stella馮少雲近日打造「零租金開舖」平台，免費租出舖面，助華人設計師展示時裝新作，又為新人搞時裝騷，協助佢哋衝出香港，展翅高飛。

馮少雲（左）開設「零租金時裝店」，助華人設計師衝出香港，旁為首席設計師楊顏蔚。

將高貴的皮草配襯透視布料，係本地設計師的大膽嘗試。

Stella喺銀行界逾二十年，仲坐擁數間中醫館同多個物業，今年初佢決定投資數千萬元，將貪靚嘅興趣化成一盤助人嘅生意，月前先後喺中環同銅鑼灣開時裝店，專賣港產同華人設計師嘅精心傑作。

兩間舖合共逾二千呎，Stella唔收租，搵咗首席時裝設計師Moon楊顏蔚同十位嚟自中大、理大同外國時裝設計系畢業生合作，專營女裝及首飾。

Stella堅信香港有唔少優秀設計師，只係藝術家大數多唔識營商、包裝，產品難遠銷海外，佢任職投資銀行多年，擅長包裝同推廣，正好彌補設計師不足。自從開時裝店後，仲有一個好處，佢一年無需出街買衫，依家只穿自家品牌，保證唔會同人撞衫。