城中鏡：趙式慶 王嘉恩武術沙龍 論盡刀劍
商人趙世光孻子、中華國術總會主席趙式慶同會長王嘉恩近期積極推廣中國武術，佢哋認為刀劍背後充滿文化內涵，值得向同好推廣，於是早前佢哋舉辦武術沙龍，除邀請武林高手李剛示範雙手刀技法，仲羅列咗幾把代表唔同時代刀劍嘅複製品，論盡呢兩種經典兵器嘅歷史源流。
趙式慶（右）同王嘉恩帶埋珍藏嚟講解刀劍之道。
李騰駿（左）同黃夢瑩（右）一齊觀賞楚國青銅劍。
武術師傅李剛（前右一）同徒弟示範雙手刀技法。
趙式慶表示劍嘅歷史比刀更悠久，早於春秋戰國就有唔少名劍嘅記載。雖然漢朝後刀取代咗劍於軍事之中扮演嘅角色，然則象徵權力嘅劍，還流傳於公卿將帥同詩人俠客之間，從而衍生一套文化禮儀，為後來嘅日本所吸取，繼而發揚光大成為人盡皆知嘅劍道。佢又話中國人長久以來都未有珍視刀劍背後嘅文化寶藏，文革時期更大肆摧殘，令好多有歷史烙印嘅刀劍不復存在。
王嘉恩就話中日兩國對待刀劍嘅態度好唔同。例如中國嘅鑄劍師向來不見經傳，而刀劍嘅質量亦有改善餘地。反觀東瀛，鑄劍師係廣受尊重嘅行業，鑄劍師為咗不辱名聲，製作都傾盡心血，務求精益求精。正所謂禮失求諸野，王嘉恩話日本人對待刀劍嘅認真態度實在值得學習。
李騰駿黃夢瑩有得着
愛好刀劍收藏嘅王嘉恩，喺今次武術沙龍之中展出珍藏嘅唐刀同東洋刀。佢話研究刀劍之道，猶如玉石鑑賞。至於座上客、青商會前主席李騰駿就話在場嘅刀劍好有歷史感，對於當中一把楚國青銅劍更係非常欣賞。青聯副主席黃夢瑩就話活動對佢好有啟發，仲有意以劍客作為下一齣話劇嘅藍本。
