政壇：搞搞政：起行人橋要兩年林鄭嫌耐
屯門天后廟廣場尋日舉行揭幕儀式，政務司司長林鄭月娥喺典禮後視察廣場四周，當佢哋去到屯門河附近，林鄭隨口問係咪呢個位置起行人天橋，屯門民政事務專員（DO）劉淦權答話唔係好長，之後林鄭再問條橋幾耐至落成，對方就答要兩年。
話聲一落，和顏悅色嘅林鄭即時面色一沉，托一托副眼鏡、憂心忡忡咁話：「吓，要兩年咁耐？」企喺隔籬嘅DO見林鄭面色不悅，有啲尷尬，好彩佢都有急才，打圓場話其實起條行人天橋好快，但計埋招標程序先要兩年。林鄭明顯唔太滿意，但礙於現場有大批市民圍觀，佢只能勉強展露笑容，笑笑口咁向DO發出命令，叫佢年底前進行招標，以免拖太耐。
年底前，即係剩番一個月啦，DO真係要快啲做嘢喇。急市民所急當然好，但負責起橋嘅都唔係DO，如果林鄭將意見帶番政府，全面加快內部嘅基建程序，咁每一區起天橋都可以加快啦！
鏡頭前同發叔好好傾
林鄭難得入到屯門，鄉議局主席劉皇發當然要盡地主之誼，兩人喺鏡頭面前雞啄唔斷好好傾，致詞時仲互送高帽，發叔話多謝政府關心屯門，林鄭就話發叔好支持政府，就咁聽以為佢哋老友，但諗真啲早幾個月堆填區擴建風波，發叔大鬧政府有乜都推晒畀屯門，照咁睇發叔句說話似乎係有骨多啲。本來發叔都陪同林鄭參觀天后廟廣場，但去到廁所附近，發叔已經唔見咗。疑似借尿遁，幾絕！
