唔少體育好手都選擇參加渣打馬拉松賽事作為挑戰身手嘅好時機,但立法會嘅「馬拉松常客」、街工梁耀忠今年就要無奈暫別全馬賽事。阿忠跑足十幾年馬拉松,正當大家以為佢今年會如常披甲上陣,佢早兩日就喺社交網站透露自己腳踭生骨刺,為免跑步令傷勢急劇惡化,經過深思熟慮後決定停跑一年,希望下屆可以重新參與。

梁耀忠跑足十幾年馬拉松,因為腳踭生骨刺要停跑一年。(資料圖片)

來屆渣馬將會喺明年二月舉行,過來人阿忠就奉勸大家跑步前後要做足熱身,否則會出現好多小毛病,又話自己大髀肌肉曾經出現疼痛,主要都是因為無做足熱身就走去跑所致。因為跑步而生骨刺都好常見,中國欄王劉翔咪都係生骨刺囉,手尾都幾長o架!

第一手消息請下載on.cc東網iPhone/iPad/Android/Windows Phone Apps