公文袋湯家驊早前隨大律師公會去北京訪問，被質疑順手向中央推銷自己嘅政改方案。學民思潮尋日開記者會，批評湯家驊方案未得到民意授權就向中央推銷方案，要求公民黨及「佔中三子」就湯家驊私下向中間人推銷方案作出回應。佢哋又話，民主派向來認為政改方案一定要得到民意授權，先有資格代表香港市民同中央進行談判協商，但湯家驊依家透過上京借啲意向中央推銷方案，令人感到憤怒及可惜，又質疑湯家驊方案並未得到公民授權。

隔咗幾個鐘，湯家驊就發聲明回應學民思潮嘅批評，佢話自己雖然一向重視年輕人意見，但強調自己嘅方案係喺《基本法》下一個冇篩選嘅民主方案。佢之後又苦口婆心咁話，依家普選之路陰霾滿布，如果泛民想建立一個民主社會，一定要學識包容兼聽，希望各界可以從多角度思考，落實無篩選嘅真普選。政改諮詢都未開始，泛民已經私下內訌鬥個你死我活，睇嚟好戲在後頭。

第一手消息請下載on.cc東網iPhone/iPad/Android/Windows Phone Apps