政壇：立會餐飲失禮 議員罷食

據聞依家立會有幾個膳食供應商，喺唔同日子為俗稱Guest Day Lunch嘅嘉賓日午宴提供服務。但弔詭嘅係，秘書處唔會預先公布邊日有邊間膳食供應商，議員要先預早作出預訂要求，再由秘書處因應人數挑選合適嘅供應商。大約喺午宴日舉行兩星期前，秘書處先會通知有關議員佢嘅訂座結果、膳食供應商名稱同菜單，換句話講議員要到嗰日先知自己當日食啲乜。

旅遊界姚思榮曾兩度邀請業界去立會宴會廳食飯，佢話覺得供應商選擇唔多之餘，啲食物仲要一次難食過一次，但啲業界朋友就因為第一次食而冇畀負評。佢又話宴會廳既然作為一個非一般地方，加上每位盛惠二百幾三百蚊，理應提升食物質素，甚至整番一至兩味拿手小菜，唔好下下咁交行貨喎！

直至質素改善

新界西嘅議員陳恒鑌話原本都有每周三去宴會廳食自助餐嘅習慣，但由於啲嘢食愈來愈難食，所以佢近月已同秘書處講唔再訂位，直至食物質素有改善先會再食。

富貴黨田北俊就話宴會廳提供嘅菜式幾乎個個星期一樣，加上又貴又唔飽，所以佢情願捱餓都唔會去宴會廳食飯。至於有冇試過星期五嘅Guest Day Lunch，佢話對嗰班供應商質素不寄厚望，寧願每次喺出面其他餐廳訂位食飯，再帶佢哋返立會參觀。

罷食點算？秘書處話會不時收集議員就膳食安排嘅意見，並向膳食供應商反映。但由於為嘉賓日午宴提供到會式嘅膳食安排同預算有局限，肯願意提供服務的供應商不多，所以冇乜計。但佢哋會研究提早將訂座結果同供應商名稱等資料通知議員，等議員可以決定食定唔食。