西諺話「魔鬼盡在細節」,真係一啲都冇講錯,尤其係政府嘅統計數字,細微之處往往可以反映大問題。

呢,統計處最新數據顯示,舊年本港吸煙人口比例為百分之十點七,有六十四萬五千人,話就話創下卅年歷史新低,但如果大家以為當局近年頻頻加煙稅,不斷擴大禁煙區等措施已見成效,咁就大錯特錯嘞,真實嘅情況可能啱啱相反吖。

好似女性煙民比例咁,數字冇下跌不特止,反而比一○年升咗零點一個百分點,其中中年女性煙民比例升得最勁。而最令人擔憂嘅係,高小學生吸煙比例明顯上升,小四至小六男生吸煙人口比例,由一○至一一年嘅百分之零點二,升至一二至一三年嘅百分之零點五,升幅一倍有多,當中超過四成喺七歲或以前已開始吸第一支煙,正式係小時了了,問你怕未。

對於咁嘅現象,當局又點睇呢?食衞局高官話喎,稍後會展開全港首個幼稚園禁煙推廣活動,仲強調任何控煙措施都會考慮,包括再加煙稅。講真,增加控煙力度,大多數市民都會歡迎,至於喺幼稚園推廣禁煙活動咯喎,就有啲九唔搭八,捉錯用神喇。

吸煙唔同食糖,如果唔係因為環境影響,好難想像幼稚園小朋友會對吸煙有興趣。所以話,學童吸煙人口比例急升,正正反映當局控煙措施效果不彰,唔能夠為小朋友提供一個清新乾淨嘅無煙環境。

嗱,政府嘅控煙措施層出不窮,五花八門,可惜來來去去都係大同小異,唔係加煙稅就係擴大禁煙區。更弊就係,當局推出措施之後就關人個關,宣傳不足,執法不力,措施形同虛設,效果自然大打折扣喇。

唔係冤枉當局,本報曾多次踢爆控煙辦監管失職。早前記者巡查全港六間大型連鎖網吧,揭發其中四間暗設吸煙區,默許客人一邊上網一邊吸煙,咁唔止危害健康,萬一引起火燭,隨時爆大鑊。記者致電政府熱線投訴網吧違規,當局話會安排巡查喎,結果等咗三日都未見控煙辦出動,你話係咪離晒大譜吖!

仲有吖,本港唔少街市嘅熟食中心多次畀市民投訴經常有食客吸煙,但情況一直冇改善,點解?咪就係因為控煙辦巡查不足,檢控數字長期偏低囉。

世不患無法,而患無必行之法。太一叮都係嗰句,淨係靠加煙稅同擴大禁煙範圍,根本就係本末倒置。控煙必須執法同教育雙管齊下,如果當局繼續對違例行為闊佬懶理,煙民只會愈來愈年輕嘅咋,叮!

第一手消息請下載on.cc東網iPhone/iPad/Android/Windows Phone Apps