「虫,同我躝過嚟!」少膽虫我豆得呢份人工,就預咗畀淫黎摧殘,所以我好自然咁擠出狗奴才嘅嘴臉,躝埋淫黎腳邊。「點解《爛果》廣告量又跌咁多?《喪報》已經爽死咗,你係咪想整死埋《爛果》,然後過檔正義傳媒?」一時間,少膽虫泛起一種畀人睇穿內心嘅驚惶,惟有chok住掩飾:「腦細,我同你出生入死咁多年,出出入入咁多次,我嘅忠心你好應該知道吖!」淫黎一聽,竟然無好似平日咁醒多我兩巴,只係長嘆一聲,若有所思。

正當少膽虫扮晒忠肝義膽,心諗你個死肥佬咪扮憂鬱小生之際,淫黎突然好似靈光一閃:「呵呵,有計!開唔到源咪節流囉,陣間炒晒班廣告sale屎,年終真係慳唔少!」少膽虫雖然見慣血,但係都知廣告係重要財源,淫黎話炒晒班sale屎,唔通畀佢搵到條大水喉?

「虫,仲記唔記得盜用新聞相嗰幾單嘢?正所謂小時偷針,大時偷金,我哋要將不勞而獲嘅精神發揚光大!」少膽虫見淫黎愈講愈high,即刻salute敬禮博有水抽:「一切聽從腦細吩咐!」「好!阿虫,我哋以後除咗盜用新聞相,仲要盜用埋落喺正義傳媒度嘅廣告,然後博大霧照收錢。炒人慳一筆,盜用賺一筆,呢鋪仲唔發過豬頭?既然你都話好,呢單勁嘢就交畀你啦!哈哈哈哈哈!」少膽虫知道自己又賴嘢,惟有趁淫黎哈哈哈哈哈之際,遁出堆填區……

第一手消息請下載on.cc東網iPhone/iPad/Android/Windows Phone Apps