SUN奇古怪：【貴子仔】Gwai3 Zi2 Zai2
「貴子仔」本來係江湖術語，最初係叫做「桂枝仔」，意思都係一樣用嚟形容有錢人家嘅仔女。因為「桂枝」本身係一種香嘅植物，「桂枝仔」即係香啲咁解。後來經口耳相傳，講吓講吓「桂枝」就變咗「貴子」，不過錯有錯着，「貴子仔」比「桂枝仔」更傳神，所以成為咗潮語之一。
中國大陸有所謂富二代，即係啲富有人家嘅第二代人物。佢哋喜歡炫富，好多都生活浮誇。例如揸名牌跑車，男嘅身邊女星名模團團轉；女嘅亦不愁寂寞，去歐洲大掃名牌手袋時裝。當中佼佼者要數中國紅十字會會長之女，佢將自己奢華嘅生活同諗法放上微博，惹嚟全國網民口誅筆伐。香港又點呢？好多富二代喺香港今日已經長大，年紀都有番咁上下，好似田大少田二少，同埋唐唐澤鉅震霆呢啲富二代，今日都年近花甲，仲坐緊喺主宰香港政經命脈嘅位置。不得不提嘅係，香港第一任特首董建華，都係一個富二代，佢當年繼承父業之後，搞到家族公司一鑊粥，要阿爺出手打救。之後佢做香港特首，一樣唔掂，最後腳痛下台。唔通呢啲「貴子仔」真係咁不濟？喺香港，「富二代」嘅潮語就係「貴子仔」或者「貴子女」。「貴子」嘅意思好明顯就係矜貴嘅子或女，有錢大戶嘅細路當然係矜貴啲。拜年嘅時候，大家都會祝啲啱啱結咗婚嘅夫婦早生貴子，以祈有一日父憑子貴，鯉躍龍門，升價十倍。
香港經過咁多年嘅發展，啲有錢人多到一個山頂都住唔晒。「貴子仔」已經去到第三代第四代。但係朱門酒肉臭，路有凍死骨。香港貧富懸殊係世界數一數二。跨代貧窮已經係其中一個社會問題。在山頂上嘅「貴子仔」，可曾俯首一看腳下底同佢同一年紀，喺貧窮線下幫阿媽推紙皮嘅「窮孩兒」？
