近年良心消費提倡者愈來愈多，有啲人買杯咖啡都要專登幫襯公平交易咖啡，有社企日前就喺香港發起「十一良心消費月」，呼籲消費者消費時，專登支持社企。民政事務局副局長許曉暉（Florence）更請纓做「代言人」，大事推介社企消費，佢話自己約人食飯，試過一日兩餐都搵社企店舖，誓做良心消費客。

Florence日前出席一個青委午餐演講會時，就不忘攞出一本社企指南出嚟硬銷吓，佢幫襯嘅社企種類繁多，有時買朱古力、有時買曲奇、茶包等，買禮物都唔揀百貨公司。講到社企產品，有啲人可能有偏見，但Florence就話，近期一批由新生精神康復會夥拍藝術家又一山人製作嘅紅白藍飾物，設計勁有型，佢一口氣掃咗成疊八達通卡套送畀朋友，結果大受歡迎，買到心水嘢，又可以幫到人，難怪佢大大聲宣傳良心消費喇！

第一手消息請下載on.cc東網iPhone/iPad/Android/Windows Phone Apps