尋日有多個團體發起遊行反歧視，擔任食物及衞生局局長時鮮有關注同志問題嘅平等機會委員會主席周一嶽（周一鑊）都有參加，仲響應大會呼籲，着咗件紅色衫添！不過佢似乎講就天下無敵，行起上嚟就雙腳無力，個遊行原本由維園行去金鐘政府總部，但周一鑊出席儀式抽水後，行到銅鑼灣崇光百貨就以有事為由離隊快閃。

周一鑊整色整水着晒紅衫去參加同志遊行，點知未行出銅鑼灣就快閃走人。

同志遊行尋日下午三點鐘喺維園出發，周一鑊到場後就自稱參加活動唔係代表政府，而係代表成個社會喎！而佢嘅任命就代表唔可以歧視任何人嘅價值觀，希望政府官員聽到同志嘅聲音。佢又話平機會嘅立場係希望可以有一個討論空間，訂立適當嘅法律去保障同志，仲叫香港人唔好戴任何有色眼鏡看待同志添。周一鑊以前做局長時又唔見佢撐同志，依家講到好撐，可惜佢對腳出賣咗自己，行一小段路就快閃，拍得住當年「民主阿婆」陳方安生喺參加七．一遊行中途離場去恤髮，足以反映佢有幾咁撐啲同志，睇嚟都係抽水居多。

第一手消息請下載on.cc東網iPhone/iPad/Android/Windows Phone Apps